پاکستان کرکٹ بورڈ نے سری لنکا انڈر 17 کے خلاف آئندہ ماہ ملتان میں ہونے والی سیریز کے لیے 17 سالہ لیگ اسپنر اذان احمد کو پاکستان انڈر 17 ٹیم کا کپتان مقرر کردیا۔
پاکستان اور سری لنکا انڈر 17 کے درمیان سیریز 9 سے 24 اکتوبر تک ملتان کرکٹ اسٹیڈیم میں کھیلی جائے گی۔ سری لنکن ٹیم 5 اکتوبر کو ملتان پہنچے گی جبکہ دونوں ٹیمیں 6 سے 8 اکتوبر تک اسٹیڈیم میں پریکٹس کریں گی۔
اذان احمد نے رواں سال نیشنل مینز انڈر 17 کپ میں راولپنڈی کی نمائندگی کی اور 8 میچز میں 36 وکٹیں حاصل کیں۔ ان کی بہترین اننگز میں 28 رنز دے کر 4 وکٹیں تھیں۔ اذان کی قیادت میں راولپنڈی نے فائنل میں ایبٹ آباد کو 125 رنز سے شکست دے کر ٹائٹل بھی جیتا۔
نیشنل انڈر 17 کپ کے بعد 48 کھلاڑیوں کو فیصل آباد میں اسکلز ڈیولپمنٹ کیمپ کے لیے بلایا گیا، جن میں سے 30 کھلاڑیوں کو کیمپ کے دوسرے مرحلے کے لیے شارٹ لسٹ کیا گیا۔ سیریز کے لیے منتخب 16 رکنی اسکواڈ کے تمام کھلاڑی نیشنل انڈر 17 کپ میں حصہ لے چکے ہیں۔
📢 Azan Ahmed named captain of Pakistan U17 squad for Sri Lanka series in Multan next month 🇵🇰
The series comprises one three-day match and five one-day matches, with all matches to be played at Multan Cricket Stadium from 9 to 24 October 🏏
Read more ➡️ https://t.co/CiaONRRc9p… pic.twitter.com/MimUtytecm
— Pakistan Cricket (@TheRealPCB) September 26, 2026
پاکستان انڈر 17 اسکواڈ میں اذان احمد (کپتان)، عبداللہ احمد بٹ، ارسلان حسن، داؤد توقیر رانا، فہد اقبال، حامد رضا، حمزہ عباس بلوچ، حسن علی، محمد عیسیٰ بلوچ، محمد احسان، محمد نوید، محمد صائم، محمد یعقوب خان، محمد یوسف، شیر ولی خان اور سدیس احمد شامل ہیں جبکہ ریزرو کھلاڑیوں میں عمار خان، عماد علی شاہ، نفیس اختر اور ثاقب خان شامل ہیں۔
شیڈول کے مطابق تین روزہ میچ 9 سے 11 اکتوبر، جبکہ ون ڈے میچز 15، 17، 19، 21 اور 24 اکتوبر کو کھیلے جائیں گے۔
